«Таза Қазақстан» бағдарламасы аясында тазалық жұмыстарын жасағандар арасында үздіктер анықталады, деп хабарлайды AtyrauPress тілшісі.
Бұл туралы табиғи ресурстар және табиғатты пайдалануды реттеу басқармасының бас маманы Мейрамбек Аухадиев мәлім етті. Жыл соңына қарай Атырау облысында «Таза аула», «Үздік көше», «Таза ауыл», «Таза аудан» номинациясының иелері анықталып, марапатталады. Өңірлік коммуникациялар қызметінің мәліметінше, өңірде бағдарлама аясында «Таза ауа» жобасы жүзеге асты. Полиция қызметкерлерімен бірлескен рейд ұйымдастырылып, 45 автокөлік тексерілді. Оның 10-ынан атмосфераға зиянды қалдықтың экологиялық нормативтен асып кету дерегі анықталды. Көлік жүргізушілері әкімшілік жауапкершілікке тартылған.
Сонымен қатар студенттердің қатысуымен «Ақжайық» мемлекеттік табиғи резерватына экологиялық туристік сапар, Әбілхайыр хан даңғылы бойында «Бүкіл Қазақстандық ағаш отырғызу» акциясы, мектеп оқушыларымен эко-қауымдастық құру мақсатында ECO Leader тренинигі, облыстық перинаталдық орталықта «Бір сәби бір ағаш» жобалары ұйымжастырылды. Балықшы ықшам ауданындағы «Отбасы» саябағында 1000-ға жуық көшет отырғызылды.
- Облыс әкімі «Таза Қазақстан» республикалық экологиялық бағдарламасы аясында жыл соңына дейін іске асуы тиіс 19 іс-шараны бекітті. Соған сай жұмыстар жалғаса береді. Экологиялық мәселелер туралы өтініш беру үшін @TazaQazBot телеграмм чат-блогы іске қосылды. Оған бүгінге дейін 116 өтініш түсіп, оның 104-і орындалды. Қалғаны бойынша жұмыстар атқарылуда, - деді М.Аухадиев.
Сәуле МАҒАУ