Жайық-Каспий облысаралық бассейндік балық шаруашылығы инспекциясы 2021-2030 жылға арналған бағдарлама негізіндегі 2025 жылға арналған балық өсірудің көлемін арттыру мәселелерін талқылады,- деп хабарлайды Өңірлік коммуникациялар қызметі.
Жиынға Жайық-Каспий облысаралық бассейндік балық шаруашылығы инспекциясының мамандары, Атырау облысы табиғи ресурстар және табиғат пайдалануды реттеу басқармасы, Маңғыстау облысы балық шаруашылығы басқармасы және БҚО табиғи ресурстар және табиғат пайдалануды реттеу басқармасының, сондай-ақ балық өсірумен айналысатын мекемелердің басшылары қатысты.
- Бүгінгі жиналысымыздың негізгі мақсаты — Атырау облысы, БҚО және Маңғыстау өңірлеріне берілген арнаулы жоспардың орындалуын бақылау. Былтырғы көрсеткіш бойынша БҚО берілген жоспардың 60 пайызын, Маңғыстау облысы 42 пайызын орындаса, Атырау облысы толықтай, яғни, 370 тонна балық шығарды. Биылғы жоспар бойынша Атырау облысы 750 тонна балық, БҚО 1055 тонна, Маңғыстау облысы 280 тонна балық өсіруді жоспарлап отырмыз. Сонымен қатар балық шаруашылығына кедергілер болып жатса, оны шешу жолдарын да қарастырмақпыз,- деді Жайық-Каспий облысаралық бассейндік балық шаруашылығы инспекциясының басшысы Нұрлыбек Гайсин.
Қазіргі таңда өңірде тауарлы балық өсіру шаруашылығымен бес мекеме айналысады. Олар: «Caspian Royal Fish» ЖШС, «Каспий Бекіресі Лимитед» ЖШС, «Тілекші» ЖШС, «Сағиева» ЖШС және «Байшуақ» ЖШС.