Резервке қабылданғандар жергілікті атқарушы органдардағы бос лауазымдарға орналаса алады. Бұл туралы ҚР Мемлекеттік қызмет істері агенттігінің Атырау облысы бойынша департаментінің басшысы, Әдеп жөніндегі кеңестің төрағасы Ерлан Ермаханбетов баспасөз мәслихатында мәлім етті, деп хабарлайды Өңірлік коммуникациялар қызметі.
Іріктеуді аумақтық департамент облыстық әкімдікпен бірлесіп жүргізді.Оған облыс бойынша 600-ге жуық адам құжат тапсырды.
Кадр комиссиясы үміткерлерді индустрия және өнеркәсіп, әлеуметтік, агроөнеркәсіптік кешен және жер қатынастары, экономика және қаржы, ТКШ және инфрақұрылым, цифрландыру салалық бағыттары бойынша таңдады. Оған жоғары білімі және кемінде 3 жыл жұмыс өтілі бар 35 жастан аспаған Қазақстан Республикасының тұрғындары қатысты.
"Құжат тапсырғандардың арасынан 479 адамның құжаты қабылданып, тестілеу кезеңіне жіберілді. Одан 204 үміткер оң нәтиже көрсетіп, жеке қасиеттерін бағалау кезеңіне жолданды. Бұдан әрі, құзыреттерді бағалау кезеңіне 51 үміткер жіберіліп, 38 үміткер «құрылымдық сұхбат» кезеңіне жіберілді. Талаптарға сәйкес, комиссия 25 адамды Өңірлік кадр резервіне іріктеп, нәтижесін шығарды", - деді Е.Ермаханбетов.
Резервтегілер екі жыл ішінде мемлекеттік қызметте бос орындарға орналаса алады.