Атырауда үйінің айналасына есірткі еккендер сотталды

Атырау қаласында екі азамат үйінің айналасына құрамында есірткі шөбін егіп, өсіргендері  үшін сотталды, деп хабарлайды AtyrauPress.

Атырау облыстық соты баспасөз қызметінің хабарлауынша, Атырау қаласының №2 сотында екі тұрғынның құрамында есiрткi бар және  өсіруге тыйым салынған өсімдіктерді заңсыз егіп, өсіргені үшін ҚК-тің 300-бабының 2-бөлігінің 1-тармағы бойынша екі азаматқа қатысты қылмыстық іс қаралды.

Сотталушылардың кінәсі куәлардың айғақтары, сараптама қорытындысы мен жедел-іздестіру шараларының нәтижелері негізінде өз дәлелін тапты. Сотталушылардың бірі кінәсін мойындаса, екіншісі тағылған айыппен келіспеді.

ҚК-тің 300-бабы 2-бөлігінің 1-тармағының санкциясында 3 жылдан 8 жылға дейінгі мерзімге бас бостандығынан айыру түріндегі жаза көзделген.

Сот жаза тағайындау барысында кінәсін мойындаған айыпталушының  шын ниетпен өкінуін, асырауында жас балаларының болуын ескерді.  Сот үкімімен сотталушылар  3 жыл 6 ай мерзімге бас бостандығынан айыру жазасы тағайындалды.

Сот үкімі заңды күшіне енген жоқ.

Эльмира МЫҚТЫБАЕВА