«Жаңа Конституция — жарқын болашақ» атты облыстық форум және гала-концертке үш мыңға жуық студент пен жас маман Жайық Арена спорт кешеніне жиналды. Ашық форматта өткен жиында қатысушыларға Негізгі заң жобасының басты нормалары жан-жақты түсіндіріліп, білім мен ғылымның ұлттық басымдық ретіндегі рөлі талқыланды және жастар алдағы референдумға белсенді қатысуға шақырылды, деп хабарлайды AtyrauPress.
Атырауда жаңартылған Конституция жобасын талқылауға арналған ауқымды облыстық форум өтті. Іс-шараға жоғары оқу орындары мен колледж студенттері, зиялы қауым өкілдері, еңбек ұжымдары, қоғамдық бірлестіктер мен жастар ұйымдарының мүшелері қатысты. Ұйымдастырушылардың мәліметінше, залда шамамен үш мың жас бас қосты.
Кездесудің басты мақсаты — Негізгі заңның негізгі нормаларын түсіндіру, оның әділеттілік, заңдылық және әлеуметтік жауапкершілік қағидаттарын нығайтудағы маңызын талқылау, сондай-ақ белсенді азаматтық ұстанымды қалыптастыру болды.
Ресми бөлімді «Х. Досмұхамедов атындағы Атырау университеті» басқарма төрағасы — ректоры Саламат Идрисов ашты. Ол өз сөзінде жаңа Конституция білім мен ғылым жүйесі үшін жаңа дәуірдің бастамасы екенін атап өтті.
Оның айтуынша, Негізгі заң жобасында білім мен ғылым мемлекеттің стратегиялық басымдықтары ретінде бекітілген. Құжаттың преамбуласында бұл бағыттар ұлттық прогрестің негізгі құндылықтары деңгейіне шығарылған, бұл ел дамуы философиясының өзгергенін көрсетеді.
— Біз жаңа Конституцияны тек құқықтық құжат ретінде ғана емес, Қазақстанның зияткерлік болашағына салынған стратегиялық инвестиция ретінде қарастырамыз. Білім мен ғылымды ұлттық басымдықтар қатарына енгізу орнықты дамудың берік негізін қалыптастырады, — деді Саламат Идрисов.
Сондай-ақ ол нақты деректер келтірді: соңғы бес жылда бакалавриат гранттарының саны бір жарым еседен астам артқан, студенттердің шәкіртақылары шамамен екі есеге өскен. Бүгінде ғылыми-зерттеу және тәжірибелік-конструкторлық жұмыстар саласында 23 мыңға жуық адам еңбек етеді. Соңғы жылдары ғылыми қызметкерлердің жалақысы екі есеге ұлғайып, ғылыми дәрежелер мен атақтар үшін қосымша төлемдер көбейтілген.
Баяндамалардың бір бөлігі білімнің қолжетімділігі мен оқу инфрақұрылымын жаңғырту мәселелеріне арналды. «Сафи Өтебаев атындағы Атырау мұнай және газ университеті» басқарма төрағасы — ректоры Гүлзада Шакуликова мемлекеттік мекемелерде тегін бастауыш және орта білім беруді сақтау әлеуметтік әділеттіліктің маңызды тетігі болып қала беретінін айтты.
Оның сөзінше, соңғы жылдары білім беру саласына салынған инвестициялар бес есеге артқан. Ел бойынша 100 мың оқушы орнына арналған 89 жаңа мектеп салынды, 2039 мектепте робототехника, химия, биология, физика және STEM пәндері бойынша 3130 заманауи кабинет жабдықталды, төрт мыңға жуық ауыл мектебі жаңғыртудан өтті. Техникалық және кәсіптік білім беру жүйесінде 558 колледж студенттерінің төрттен бірі дуальды жүйе бойынша кәсіпорындарда тәжірибеден өтуде. Бұл білім мен экономиканың байланысын нығайта түседі.
— Білім мен ғылымды ұлттық басымдық ретінде мойындау — технологиялық серпіліске және бәсекеге қабілетті адами капиталды қалыптастыруға жасалған қадам, — деді спикер.
Форум барысында адам құқықтарын қорғауды күшейту, азаматтардың мемлекеттік шешімдер қабылдау үдерісіне қатысуын кеңейту, волонтерлік қызметті қолдау және билік тармақтары арасындағы тепе-теңдікті нығайту мәселелері де талқыланды. Жаңа редакциядағы Конституция азаматтардың заң алдындағы теңдігі мен мемлекеттің әлеуметтік жауапкершілігі қағидаттарын бекітетіні атап өтілді.
Мұнай-газ саласының аға операторы Ғалым Камзаев жастар алдында сөйлеген сөзінде референдумға қатысу — әрбір азаматтың өз ұстанымын білдіру мүмкіндігі екенін айтты.
— Бүгінгі таңдауымыз — ертеңгі болашағымыздың негізі. Конституция азаматтардың құқықтары мен бостандықтарын сенімді қорғайтынына көз жеткізу маңызды, — деді ол.
Форум динамикалық форматта өтті: ресми баяндамалар концерттік бағдарламамен алмастырылып отырды. Сахнада жас орындаушылар мен танымал қазақстандық әртістер өнер көрсетті. Кештің хедлайнері — танымал әнші Нұрболат Абдуллин болды. Оның өнер көрсетуі мерекелік бағдарламаның шарықтау шегіне айналды.
Ұйымдастырушылардың айтуынша, кездесу тек мерекелік емес, ағартушылық сипатта өтті. Студенттер спикерлерге сұрақ қойып, Конституция жобасын талқылап, негізгі өзгерістер бойынша өз пікірлерін қалыптастыруға мүмкіндік алды.
Атырауда өткен форум жастарға жаңартылған Негізгі заңға енгізіліп жатқан құндылықтар мен басымдықтарды түсіндіруге арналған қоғамдық диалог алаңдарының бірі болды. Сонымен қатар, елдің қоғамдық-саяси өміріне белсенді қатысудың маңызы ерекше екені атап өтілді.