Мен кезінде Атыраудағы С.Қазыбаев атындағы облыстық мектеп-интернатта көп жыл тәрбиеші болып еңбек еттім. Сондықтан балалардың қауіпсіздігіне қатысты мәселе маған жақсы таныс.
Қазақстан Республикасы Төтенше жағдайлар министрлігінің шомылу маусымы қарсаңында судағы жазатайым оқиғалардың алдын алуға бағытталған кешенді профилактикалық жұмыстары – қазіргі қоғам үшін аса маңызды әрі өте өзекті бастама.
Қазіргі таңда жаз мезгілінің келуімен көптеген отбасы өзен-көл жағасына барып демалуды жөн көреді. Алайда, қауіпсіздік ережелерін ескермеген жағдайда мұндай демалыс қайғылы жағдайларға алып келуі мүмкін. Осы тұрғыдан алғанда, ТЖМ құтқарушыларының жергілікті атқарушы органдармен бірлесе отырып су айдындарын, соның ішінде шомылуға рұқсат етілмеген орындарды патрульдеуі – азаматтардың өмірі мен денсаулығын сақтау жолындағы нақты әрі нәтижелі қадам.
Еліміздің әр өңірінде түрлі форматтағы профилактикалық шаралардың өтуі – бұл жұмыстың жан-жақтылығын, жүйелілігін және ауқымдылығын көрсетеді. Мәселен, Астанада орнатылған 150-ден астам ескерту белгісі мен ақпараттық стендтер, №6 мектеп-гимназиясының ауласында өткізілген «Қауіпсіз жаз әліппесі» атты балалар квесті – оқушылардың қауіпсіздік ережелерін ойын арқылы меңгеруіне мүмкіндік берді. Бұл – білім берудегі инновациялық әрі нәтижелі тәсілдің жарқын мысалы.
Батыс Қазақстан облысында жүргізілген түнгі патрульдеу жұмыстары мен түсіндіру шаралары, Шымкент қаласындағы жаңа үлгідегі ескерту белгілерін сынақтан өткізу – қауіпсіздікке заманауи тәсілмен келудің жарқын үлгісі. Ақмола облысында өткізілген лагерь қызметкерлері мен волонтерлерге арналған оқыту курстары, сондай-ақ балалар лагерлеріндегі алғашқы көмек көрсету мен судағы қауіпсіздікке арналған сабақтар – тек балаларға ғана емес, ересектерге де қажетті ақпараттың жеткізілуін қамтамасыз етті.
Жетісу облысындағы әлеуметтік осал топтағы балаларға бағытталған оқу-ағарту шаралары – ешкімнің назардан тыс қалмағанын көрсетеді. Бұл – әлеуметтік теңдік пен қамқорлық қағидаттарына негізделген нақты іс.
Мұғалім ретінде мен бұл бастамалардың маңыздылығын жоғары бағалаймын. Себебі біз, ұстаздар қауымы, балалардың тек білім алып қана қоймай, қауіпсіз өмір сүру мәдениетін де бойына сіңіруін қалаймыз. ТЖМ қызметкерлерінің интерактивті ойындар, ашық сабақтар, кездесулер арқылы балалармен тіл табыса отырып жұмыс жүргізуі – оларды жалықтырмай, керісінше қызығушылықпен қабылдайтын орта қалыптастырады.
Осындай жүйелі, тыңғылықты, ведомствоаралық әріптестікке негізделген жұмыстардың арқасында ғана біз балалар мен жасөспірімдер арасында қауіпсіздік мәдениетін қалыптастырып, болашақта болатын қауіп-қатердің алдын ала аламыз деп сенемін.
Сәулеш ШАЙХИЕВА,
ардагер ұстаз