IOI-2024 олимпиадасына 90 елден келген 350 қатысушының арасынан қазақстандық оқушылар үш күміс, бір қола медаль иеленді, деп хабарлайды AtyrauPress тілшісі.
Жүлдегерлердің қатарында атыраулық оқушы Мансұр Таймас та бар. Бұл туралы бізге облыстық білім беру басқармасының баспасөз хатшысы Эльмира Тұңғатарова мәлім етті. Таймас Мансұр – Атырау облыстық Білім беру басқармасының №1 «Білім-Инновация» лицей-интернатының оқушысы. Ол соңғы жылдары орасан зор жетістіктерге қол жеткізді. Атап айтар болсақ, 2021 жылы информатикадан Еуразиялық командалық олимпиадасынан күміс медаль, сол жылы EJOI Информатикадан Еуропалық жасөспірімдер олимпиадасынан қола медаль, IATI (Халықаралық күзгі турнир) қола медаль, Республикалық информатика олимпиадасынан күміс медаль иеленген. Ал 2022 жылы Информатикадан Еуразиялық командалық олимпиададан күміс медаль, Республикалық информатика олимпиадасынан алтын медаль, EJOI (Информатикадан Еуропалық жасөспірімдер олимпиадасы) күміс медаль иеленген талантты шәкірт атанды. Биыл Египеттің Александрия қаласында информатика пәні бойынша өткен халықаралық олимпиадада Қазақстанның құрама командасы 100 пайыз нәтиже көрсетіп, төрт жүлде жеңіп алды.
Амандық САҒЫНТАЙҰЛЫ