WhatsApp әлеуметтік желісінде Атырауда 1 маусым балалар күніне орай тегін тәттілер беріледі деген сыңайда таратылған аудиожазба шындыққа сай келмейді
WhatsApp әлеуметтік желісінде «1 маусымда Исатай-Махамбет алаңында концерт болады. Барлығы да балалар үшін тегін. Балмұздақ, попкорн, мақта, кәмпит сияқты тәттілер сататындарға әкімдіктен ақша бөлініп, сағат 9-11 аралығында тегін таратылайын деп жатыр. Сонымен қатар ойын құралдары бойынша да балалар тегін ойнатылады. Бір сөзбен айтқанда ертегілер әлемі сынды қызықты іс-шара болады» деген аудиожазба тарауда.
Бұл ақпаратты облыстық Мәдениет, тілдерді дамыту және архив ісі басқармасы басшысының міндетін атқарушы Мира Дәулетбаева жоққа шығарды, деп хабарлайды Атырау облысы Өңірлік коммуникациялар қызметі.
-Бізде басқарманың ұйымдастыруымен Құрманғазы мәдениет сарайында сағат 15.00-де «Дарын» ер балалар қорының концерті өтеді. Сол күні осы сағатта Ш.Сариев атындағы өнер музейінде көрме өтеді деп жоспарлануда. Сондай-ақ сағат 12.00-де Махамбет атындағы академиялық қазақ драма театрында «Алладин» ертегісі қойылымы болады. Одан кейін театр алдында концерттік бағдарлама бар. Басқарма тарапынан басқа іс-шаралар жоспарланған жоқ. Сондықтан, бұл ақпарат жалған, деді М.Дәулетбаева.
Сонымен қатар, Атырау қалалық әкімдігінің баспасөз хатшысы Нұрислам Ғұмар мұндай ақпарат шындыққа жанаспайтынын жеткізді.
Сондай-ақ оның берген мәліметінше, балалар күніне арналған іс-шаралар төмендегідей:
1. Сағат 09.30-да Атырау облыстық жастар шығармашылық орталығында «Біз бақытты балалар, өнер сүйген» облыстық балалар ән фестивалі;
2. Сағат 11.00 «Ретро» саябағында, сағат 18.00-де «Керемет» саябағында «Сазды керуен» қайырымдылық концерттік бағдарламасы;
3. Сағат 15.00-де «Жастар» саябағында «Әсем әлем» қайырымдылық көрмесі;
4. Сағат 19.00 Бейбарыс алаңында «Біз бақытты баламыз» балаларға арналған ойын-сауық бағдарламасы;
5. Сағат 18.00-де «Ретро» саябағында Қайырымдылық концерттік бағдарламасы;
6. Сағат 18.00-21.00-де «Жастар» саябағында Халықаралық балаларды қорғау күніне арналған флешмоб;
7. Сағат 19.00-21.00-де Бейбарыс алаңында балаларға арналған спорттық бұқаралық жарыстар.