Заңсыз таксистердің көлігі тартып алына ма?

Қазіргі таңда жеке кәсіпкер ретінде тіркелмей такси ретінде қызмет ететін фактілер анықталған жағдайда жеке көліктерді конфискацияланып жатқаны туралы ақпарат қайта-қайта пайда болып жатыр.

Бұл мәлімет шындыққа жатпайды. Әкімшілік құқық бұзушылық туралы кодекстің бірқатар баптарымен соттың шешімі болған жағдайда меншіктен айыру мүмкіндігі көзделген.

Қазақстан Республикасының Конституциясына сәйкес ешкім өз мүлкінен айырылуы мүмкін емес. Оны тек сот шешімі бойынша ғана айыра алады. 

Қазіргі таңда заңсыз такси ретінде жұмыс істегені үшін көлік құралдарын конфискацияланғаны туралы бірде бір дерек жоқ. Сонымен қатар, Мемлекеттік кірістер комитеті такси қызметін жеке кәсіпкер ретінде тіркеусіз жүзеге асырғаны үшін он бес АЕК мөлшерінде әкімшілік айыппұл қарастырылғанын ескертеді. Жеке кәсіпкерлікті электронды үкімет порталы арқылы (е-лицензирование) немесе «E-Salyq Business» мобильді қосымшасы, Kaspi және Halyk банктерінің мобильді қосымшалары арқылы тіркеуге болады.