Илья Жақанов 85 жасында "16 жас" деген ән жазды
Атырауда белгілі өнер иесі Илья Жақановтың шығармашылық кеші өтті, деп хабарлайды ATPress.kz.
- Илья ағамыз осы кештің алдында ғана маған "16 жас" деген жаңа әнін үйретті. Мерейлі 85-ке келіп, "16 жас" деп ән жазу - кез келген композитордың қолынан келе бермейтін іс. Қазақ руханиятының абызына, өнердегі ұлы ұстазға айналған ағамызға шығармашылық шыңын тілейміз, - деді кештің арнайы қонағы, дәстүрлі ән өнерінің бұлбұлы Сәуле Жанпейісова.
Кеш соңында сөз алған Илья Жақанов 85-ке келсе де қайғы ойлап, қартайып отырмағанын айтып, көптің көңілін бір көтерді.
- 85 жас деген не өзі, тәйірі? Мен әлі жаспын. 85 жасымда осы жердегі "Сарытоғайды" әнге қостым. Қалпына келген Аралға көңілім марқайып, теңіз жағасындағы екі жастың сырлы сезімін әуенге арқау еттім, - деді әзілдеуді де ұмытпаған ақсақал.
- Әнмен әрленген өмірімнің бір күні бүгін сіздермен өтті. Осыған дейін қандай туындыны қолға алсам да, өмірге шынайы, саф дүниені әкелсем деп тіледім. Оның бәрін Қасымның:
Өкінбен мен де бір күн өлемін деп,
Өкінем оқсата алмай келемін деп.
Күніне мың ойланып, жүз толғанам,
Өзіммен бірге өлмесін өлеңім деп, дегеніндей, толғанып отырып жаздым. Менің мәртебем биіктесе, ол - сіздердің арқаларыңыз, - деді абыз.
Сонымен қатар ол концертте өнер көрсеткен әншілер мен
Дина Нұрпейісова атындағы академиялық халық аспаптар оркестріне алғысын айтты.
Кеш соңында облыс әкімі Серік Шапкенов көпшілікті өнер мерекесімен құттықтап, мерейгер талант иесіне ризашылығын жеткізді.
- Керемет кеш сыйлаған Илья ағамызға алғысымыз шексіз.
Бүгін ол бізді қазақтың ұлан-байтақ даласын ән қанатында шарлатқандай әсер қалдырды.
Сіз - қайраткер, композитор, суретші, зерттеуші әрі еңбек ері, бір сөзбен айтқанда сегіз қырлы, бір сырлы талант иесісіз. Осыны бағалап, Президентіміздің сізге "Еңбек ері" деген лайықты атақ ұсынғаны абыройыңызды асқақтата түсірді, - деді облыс әкімі.
Сондай-ақ ол бұндай кештерді тек Атыраумен ғана шектеліп қалмай, еліміздің әр түкпірінде өткізу қажеттігін атады. Інілік ілтипаты мен ел құрметін жеткізген аймақ басшысы Илья Жақанов пен оның жары Тиыш Алтайқызын сахнаға көтеріп, өнер абызына шапан жапты.
Айта кетейік, "Қазақстанның Еңбек Ері", Қазақстанның және Қырғызстанның еңбек сіңірген қайраткері, жазушы, өнер зерттеушісі, композитор Илья Жақановтың 85 жылдығына арналған "Әнім саған, туған ел" атты шығармашылық кешінде автор туындыларын Дина Нұрпейісова атындағы академиялық халық аспаптар оркестрі сүйемелдеді.
Сондай-ақ, Нұрмұхан Жантөрин атындағы облыстық филармония әншілері мен Батыс Қазақстан облысынан келген өнерпаздар композитор әндерін нақышына келтіре орындап, ел ықыласына бөленді.
