Ауылға бөлінген қаржы аз болмауы тиіс — депутат
Ауылды көркейту, ондағы тұрғындардың өмір сүру сапасын арттыру мақсатында биыл мемлекеттен 62 млрд. теңге бөлінген.
Ал, бұл — негізгі бөліну тиіс қаражаттың жартысына әрең жететін сома. Бұл туралы Мәжіліс депутаты Нұрлыбек Ожаев әлеуметтік желідегі парақшасына жариялады, деп хабарлайды ATPress.kz.
Атырау облысының атынан сайланған халық қалаулысы ҚР Премьер-Министрінің атына депутаттық сауал жолдағанын және оның нәтижесін желі арқылы жеткізді.
«Ауыл - Ел бесігі» жобасы аясында 2025 жылға дейін 3500 ауылдың инфрақұрылымын жаңғырту көзделген болатын. Жобаға сай, ауылды жаңа өңірлік стандарттарға сәйкестендіру және ауыл тұрғындарының өмір сүру сапасын жақсарту үшін 2022 жылы 570 ауылға 130 млрд. орнына тек 62 млрд. қаржы қаралған-ды.
Осыған орай, депутаттық сауал нәтижесінде, кешегі қабылданған Республикалық бюджетті нақтылау кезінде ауылдарды көтеруге қажетті қаражат толық, яғни 127,9 млрд. теңге бөлінгендігін хабарлаймын» дейді Нұрлыбек Ожаев жазбасында.
