Атыраулық оқушы халықаралық Балқан математикалық олимпиадасының жеңімпазы атанды, деп хабарлайды AtyrauPress облыстық білім басқармасының баспасөз қызметіне сілтеме жасап.
Албания астанасы Тирана қаласында 20 мемлекеттің 130-ға жуық мектеп оқушыларының қатысуымен өткен жасөспірімдер арасындағы халықаралық Балқан математикалық олимпиадасында Қазақстан құрамасы 6 медаль жеңіп алып, жеңіс туын желбіретті.
Жүлдегерлер қатарындағы атыраулық «Білім-Инновация» лицей-интернатының 9-шы сынып оқушысы Абдуллаев Аят қола медаль еншіледі.
Аят бүгінде көптеген білім додаларында топ жарып, Атырау облысының намысын қорғап жүрген оқушылардың бірі. Алдағы шілде айында өтетін Халықаралық Туймада олимпиадасына қатысады.
Айта кету керек, соңғы үш жылда халықаралық олимпиадалар мен жобалар конкурсынан атыраулық оқушылар 57 медаль жеңіп алды.
Мира НҰРТАЕВА