Атырауда Атырау облысы Білім беру басқармасының мемлекеттік әлеуметтік тапсырысы аясында жүзеге асырылып жатқан «Ұрпағыңмен мың жаса!» жобасы басталды. Жобаның мақсаты – әкелер мен балалар арасындағы байланысты нығайту, оларға ұлттық құндылықтарды дәріптеу және отбасы тәрбиесінің маңыздылығын атап өту, деп хабарлайды AtyrauPress.
Жоба аясында 20 әке мен олардың балалары Атырау – Сарайшық бағыты бойынша екі күндік атпен жүретін жорыққа аттанды. Бұл саяхат көптеген балалар үшін алғаш рет атқа міну тәжірибесі болып, туған өлкенің тарихына терең бойлау мүмкіндігін берді.
Жол бойы қатысушыларға гидтер өңірдің көрнекті тарихи тұлғалары, ұлттық дәстүрлері мен мәдени мұрасын қалыптастырған оқиғалар туралы әңгімелеп отырды.
Екінші күні саяхатшылар Сарайшық туристік орталығына барып, ұлттық ойын – жебе атуды (садақ ату) тәжірибеден өткізді. Балалар мен әкелер ерекше әсер алғандарын айтып, табиғатпен үндестік пен ежелгі қаланың тарихын тереңірек танығандарын жеткізді.
Жорық соңында ең белсенді қатысушылар – әкелер мен балалар арнайы грамоталармен марапатталды. Әкелер екі күн ішінде бір-бірімен жақынырақ танысып, балаларымен керемет уақыт өткізгендерін атап өтті. Балалар да алған әсерлерін жасырмады: табиғат аясындағы демалыс, атқа міну және туған жер тарихымен танысу олардың жадында өшпес із қалдырды.
Білім беру басқармасының мәліметінше, жыл бойы сегіз ірі шара өткізу жоспарланған, ал жалпы жобаға шамамен 4 мың әке қатысады.