Пәндік олимпиаданы Х.Досмұхамедов атындағы Атырау университеті физика, математика және ақпараттық технологиялар факультеті өткізуде. Жеңімпаздарға оқу орны 7 мамандық бойынша білім грантын және ақылы оқуға түрлі жеңілдіктер береді, деп хабарлайды AtyrauPress тілшісі.
Атырау университетінің баспасөз қызметі берген ақпарат бойынша математика, физика, информатика пәндері бойынша өтетін пәндік олимпиадаға Атырау облысы мен Атырау қаласының жалпы орта білім беретін мектептерінің 11 сынып оқушылары қатысып жатыр.
«Олимпиада қорытындысы бойынша жүлделі орын алған оқушыларға жоғары білім беру ұйымдарына оқуға қабылдаудың үлгі ережесіне сәйкес «В009-Математика мұғалімдерін даярлау», «В010- Физика мұғалімдерін даярлау», «В011-Информатика мұғалімдерін даярлау», «В054- Физика», «В055-Математика және статистика», «В057-Ақпараттық технологиялар», «В076- Стандарттау, сертификаттау және метрология» (сала бойынша) мамандықтары бойынша білім гранты және ақылы бөлімде оқуға арналған түрлі жеңілдіктер табысталады», - деп хабарлады баспасөз қызметі.
Олимпиада қазақ, орыс тілдерінде өткізіледі. Оны өткізу бағдарламасы бойынша қатысушылар бірінші кезеңде тестілеуден өтіп, екінші кезеңде сәйкес пәндер бойынша тапсырмаларды орындайды.
Мира Нұртаева