Атырауда браконьерлер қамыс арасына 100 келіден астам бекіре жасырған

Атырауда қамыс арасынан браконьерлер жасырған 101,6 кел бекіре балығы табылды, деп хабарлайды AtyrauPress.

«Жайық-Каспий облысаралық балық шаруашылығы бассейндік инспекциясының қызметкерлері «Бекіре-2023» кең ауқымды балық қорғау акциясын өткізу кезінде Жамбыл ауылы маңында рейдтік іс-шаралар өткізіп, Жайық өзені қамыс аймағында жалпы салмағы 101,6 келіні құрайтын 4 қап бекіре тұқымдас балығы табылды», - деп жазылған ҚР Экология және табиғи ресурстар министрлігінің Балық шаруашылығы комитетінің сайтында.

Аталған жағдай ҚР Қылмыстық кодексінің 339-бабы 1-бөлігінің белгілері бойынша СДТБТ-да тіркелген, құқық қорғау органдары сотқа дейінгі тергеу жүргізеді.

Балық ресурстарына келтірілген залал алдын ала есеп бойынша 105 млн  156 000 теңге.

Балық қорғау мақсатында рейдтік шаралар жалғасып жатыр.  

 

Эльмира МЫҚТЫБАЕВА