Жұмекен тұрғындарына жер телімі беріле ме?

Еңбекші ауылдық округі әкімі Жасқайрат Хамзин тұрғындар алдында атқарылған жұмыстарды баяндады, деп хабарлайды AtyrauPress тілшісі.

Бұл туралы Құрманғазы ауданы әкімдігінің баспасөз қызметі мәлім етті. Округ әкімінің баяндамасы өткен есеп беру кезінде тұрғындардан түскен ұсыныстардың орындалысын қамтыды. Атап айтқанда, «Өңірлерді дамыту» бағдарламасы аясында округтегі Ынтымақ көшесіне 10 нүкте түнгі жарық шамдары орнатылған. Ауыл тұрғындарының көтерген мәселесі – такси тұрағын белгілеу бойынша, 0,1 гектарға жер актісі алынып, құжаттары заңдастырылған. Сонымен қатар, ауылішілік жолдарды күтіп ұстау мақсатында, жол белгілері мен жылдамдық кедергілерін орнату жұмыстары да жүргізілген.

Бұдан өзге округ әкімінің баяндамасында ауыл тұрғындарының өзекті мәселесі – Кадырка ауылындағы 60 пәтерлік тұрғын үйлердегі пәтер жалдаушыларды тоқтату және ай сайынғы коммуналдық қызметке ақы жинаудағы кедергілер айтылды. Бұл мәселе бойынша, тұрғын үйлерге арнайы құрылған комиссия арқылы тексерулер жүргізіліп, төрт пәтер жалдаушы анықталып, құжаттары аудандық полиция бөліміне жолданған. Сондай-ақ құрылысы аяқталған инженерлік-коммуникациялық инфрақұрылымнан тұрғындарға жер телімдері наурыз айынан бастап тапсырылатынын қаперге берді.

Округ әкімінің баяндамасынан соң аудан басшысы Марат Мурзиев ауыл халқын толғандырған мәселелерге құлақ түрді. Тұрғындар кезекпен сөз алып, инженерлік инфрақұрылымға, өзектерді тереңдету жұмыстарына, Қошалақтағы ауыз су мәселесіне, ауылдың кейбір көшелеріне жарық, жол жүргізілуі, мал жайылымдарына қатысты өздерінің түйткілді және елеулі мәселелерін жеткізді.

Аудан әкімі Марат Бисенғалиұлы өз сөзінде Еңбекші ауылдық округіне қатысты жасақталып және құрылысы жүріп жатқан жобалармен таныстырып өтті. Сонымен қоса, аудан басшысы өзектердің тереңдетіп қазылуына орай, аудан бойынша 150 шақырым түп тереңдету жұмыстарына ЖСҚ жасақталғанын, аталған жобада Сурхан, Қадыр, Көнеу өзектерін түп тереңдету қарастырылғанын да еске салды.

Қорытынды сөзінде аудан әкімі көтерілген әр мәселені тұрғындармен талқылай отырып, шешімін табуды округ әкіміне жүктеді.