«Мерейлі отбасы – 2025» ұлттық конкурсының алғашқы кезеңі – аудандық және қалалық турына қатысу үшін құжаттарды қабылдау басталды,-деп хабарлайды Өңірлік коммуникациялар қызметі.
Конкурс ҚР Президентінің 2013 жылғы 6 желтоқсандағы №250 өкіміне сәйкес жыл сайын өткізіліп келеді. Басты мақсат – отбасылық құндылықтарды насихаттау, балаларды тәрбиелеудегі ата-ананың рөлін арттыру және қазақстандық отбасының жағымды бейнесін қалыптастыру.
Конкурс ҚР Үкіметінің 2014 жылғы 5 наурыздағы №181 қаулысымен бекітілген қағидаларға сәйкес өткізіледі. Қатысуға ниетті отбасылар өтінімдерін 2025 жылғы 15 мамыр мен 14 маусым аралығында аудандық және қалалық ішкі саясат бөлімдеріне тапсыра алады.
Қажетті құжаттар:
• Отбасы мүшелерінің жеке басын куәландыратын құжаттар мен туу туралы куәліктің көшірмелері;
• Некеге тұру туралы куәлік;
• Марапаттау және жетістіктерді растайтын құжаттар;
• Екі данадан кем емес ұсыным хаттар;
• Қоғамдық және еріктілік қызметтерін растайтын құжаттар (бар болған жағдайда).
Құжаттар қағаз немесе электрондық түрде, түпнұсқасымен бірге қабылданады.
Мерзімдер кестесі:
• 15 мамыр – 14 маусым: құжат қабылдау;
• 15 маусым – 1 шілде: өтінімдерді қарау және облыстық кезеңге жолдау;
• 3 шілде – 17 шілде: республикалық кезеңге іріктеу.
Конкурсқа сотталған немесе қызметі Қазақстан Республикасында тыйым салынған ұйымдардың құрамында болған отбасы мүшелері бар жанұялар қатыса алмайды.