Мақат кентіндегі Болашақ ықшам ауданында «Болашақ аллеясының» құрылыс нысанына жобалау-сметалық құжаттамасы жасақталып, жуырда сараптамадан өтті, деп хабарлайды AtyrauPress тілшісі.
Бұл туралы аудан әкімдігінің баспасөз қызметі мәлім етті. Тапсырыс беруші Мақат аудандық құрылыс бөлімінің басшысы Болатбек Сәрсеннің айтуынша, құрылыс қаражатының шығыны 113 млн 263 мың тенгені құрайды. Бүгінгі күні ол сумманың 50 млн теңгесі бөлінген.
— Бірінші мамыр күні мердігер мекеме «ЭнергоСнабРесурс» ЖШС демонтаж жұмыстарын бастап кетті. Нысан күзге дейін тапсырылуы керек. Кент орталығында орналасқан аллея болашақта балалардың ойнауына және ересектер серуендеуіне арналған көрікті жерлердің бірі болмақ,- деді Б.Сәрсен.
Оның айтуынша, көлемі 0,585 гектар аумақты алып жатқан аллеяда спорт алаңы, балалар ойын алаңы, демалыс аймағы қарастырылған.
Амандық САҒЫНТАЙҰЛЫ
