Жылыой ауданында халықаралық әйелдер күніне арналған мерекелік шара өтті, деп хабарлайды AtyrauPress тілшісі.
Аудан әкімдігінің баспасөз қызметі мәлім еткендей, шара басында жергілікті өнерпаздар аруларға арналған әдемі өлең-жырларын тарту етті. Мерекелік кеште аудан әкімі Жұмабек Қаражанов аудан аруларын мерекемен құттықтап, сөз сөйледі. Құттықтау сөзден кейін денсаулық сақтау, білім және мемлекеттік қызмет салаларында қызмет атқарып жүрген нәзік жандыларға облыс әкімінің алғыс хатын және 6 көп балалы анаға «Алтын алқа» мен «Күміс алқа» табыстады. Сондай-ақ, әр салада еңбек етіп жүрген аруларды да марапаттап, алғыс хат табыстады. Мереке қарсаңында әйелдер арасында волейболдан аудандық турнир өткен болатын. Спорттық сайыстың қорытындысы бойынша мерекелік кеште үздік ойын өрнегін көрсеткен спортшылар мен жеңімпаз командалар марапатталды. Мерекелік шара концерттік бағдарламаға ұласып, асыл жанды аруларға көтеріңкі көңіл-күй сыйлады.