07 Тамыз, 2018

Атырауда алғаш рет «инфо-донор» бағдарламасы іске қосылды

ATPress.kz. 7 тамыз. «Инфо-донор» бағдарламасы Батыс Қазақстан аймағы бойынша тек Атырау облысында жүзеге асуда, деп хабарлайды өңірлік коммуникациялар қызметі.

Елбасы жолдауындағы «Цифрлық Қазақстан» бағдарламасы аясында жүзеге асқан жоба Атырау облыстық денсаулық сақтау басқармасының қолдауымен Атырау қан орталығына енгізілді. «Инфо-донор» іске қосылғалы бір ай көлемінде 656 адам электронды тіркеуден өтіп, донор болуға ниеттенген. Оның 473-і қан тапсыруға жарамды болған.

«Инфо-донор» бағдарламасы жеке куәлік арқылы донордың орталықтағы маршруттарын автоматты түрде анықтап, реттеп отырады. Яғни, тіркеу бөлімі - алдын-ала тексеру зертханасы - терапевт қабылдау - қан тапсыратын зал. Донор осы бағыттар бойынша жүріп, барлық бөлімдерде тіркеуден өткеннен кейін, ол туралы ақпарат жедел электронды түрде жетеді.

«Аталған бағдарлама іске қосылғалы жұмысымыз жеңілдеді. Мамандар жедел түрде кезектегі донорды қабылдап, анализдерін анықтап, қан тапсыруға жібереді. Донордың сараптама нәтижелері, жұмыстың орындалу барысы жүйеде бақылауда болады. Тұрғындардың да уақытын үнемдеуіне қолайлы», - дейді қан орталығының директоры Жәңгірхан Бахонов.

Тоқтала кетейік, Атырау облысында тіркеуде тұрған донор жеке куәлігі арқылы жүйе іске қосылған Қазақстанның басқа қалаларында да тексеріліп, донор бола алады.

Айқара Ғұмар

Тегтер: инфо донор қан тапсыру Атырау